Á fundi borgarstjórnar í dag var ákveðið að unnin skyldi græn samgöngustefna fyrir borgina, með heitið "Grænar ferðir". í fréttatilkynningu frá borginni kemur fram að "...markmið samgöngustefnunnar yrði að innleiða vistvænar samgöngur í starfsemi borgarinnar og stuðla að betra og umhverfisvænna samgöngumynstri til framtíðar. Samgöngustefnan er hluti af Grænum skrefum borgarinnar og mun ná til allra sviða og stofnana Reykjavíkurborgar...".

Enn er ekki búið að skilgreina nákvæma útfærslu stefnunnar en Þorbjörg Helga Vigfúsdóttir, formaður umhverfis- og samgönguráðs fullyrðir: "borgin skuldbindur sig til að bjóða starfsmönnum sínum að nýta aðra kosti en einkabílinn vegna starfa sinna". Þannig verði komið til móts við þá starfsmenn sem velji sér fjölbreyttari ferðamáta til að koma sér til og frá vinnu.

Samtök um Bíllausan lífsstíl fagna þessu framtaki borgarinnar og óska þess að Borgin sjá sér hag í að gera samgöngustefnu sína sem myndarlegasta. FÍB hefur reiknað saman nokkur dæmi um reksturskostnað bifreiða árið 2008, ódýrasta dæmið hljóðar upp á 770.075 kr. Ljóst er að á komandi misserum mun mörgum fjölskyldum muna mikið um slíkar upphæðir. Vonandi stuðla Grænar ferðir að því að sem flestir borgarstarfsmenn sjái sér leik á borði og taki upp fjölbreyttari samgöngumáta, heilsu sinni til heilla. Hvort heldur sem er líkamlegrar, andlegrar eða fjárhagslegrar.

Nánari upplýsingar um verkefnið má finna á síðu Reykjavíkurborgar.